ألف مبروك

الانسان من طبعه الفضول.. و انه يسأل اسئلة كتير وحتى لو ماكنش ليها لازمة.. وأنا بقى في أسئلة نفسي اعرف اجابتها من سنين كتيرة اوي وعارفة اني مش هاعرف اجابتها..أسئلة كده من اللي لو سألتها لحد هيبصلك وبعدين يرفع حاجب وينزل التاني ويلف ويسيبك على طول.. وانت واقف في مكانك حاسس بعبط هل عليك كده مش عارف ليه..عارفين الاحساس ده؟؟

اخدنا قبل كده في قصة طه حسين الأيام ان في جملة ارقته مدة كبيرة وكانت هتجننه.. وهي "الحق هدم الهدم".. فاكرة ان أول ما المستر قال الجملة دي قعدنا نضحك طول الحصة.. مش فاكرة ليه.. زي ما بالضبط مش فاكرة ليه انا اساسا كتبت القصة دي.. بس انا مش هامسحها..هو بنزين بيخلص على الفاضي بقى واهدار طاقة ووقت ولا ايه؟؟

المهم.. انا هاسأل الأسئلة يمكن اعرف لها اجابة..

ممكن اعرف هو ليه الناس لما بتبارك لك بتقولك 1000 مبروك؟؟ ليه مش 20000 مثلا ولا 1859 يعني؟؟

ليه لما يكون عيد ميلادك بيقولوا عقبال 100 سنة؟؟ اشمعنى 100؟؟

طب واللي عدى ال100 سنة وبقى معمر عنده 109 او 110 سنين بيقولوا له ايه في عيد ميلاده؟؟

هو ليه في ناس بيقولوا بعظمة لسانك.. هو اللسان في عظم؟؟

طب ليه لما الواحد ما يكونش طايقك بيقولك ماتغور في 60 داهية.. هو لو كارهك نص نص هيقولك في 30 داهية مثلا؟؟

هو ليه لما واحد يكشر بيقولوا له انت عامل 111 بالرغم من اني بابص على جبينه ما بلاقيش 111 بلاقي 11 بس.. جابوا ال100 الزيادة دول منين؟؟

ليه كل مرة يعلنوا فيها عن اي حاجة معاها اي حاجة تانية غير الحاجة الاولانية وتكون هدية بيقولوا "هدية مجانية" هو في بالذمة هدية مش مجانية؟؟ يعني اروح ازور بنت خالتي واقولها خدي الهدية دي بمناسبة العيد بس اديني ثمنها؟؟

مش هاعرف اكمل كتابة النهاردة للموضوع ده لأن ظرار حرف ال "ظ" باظ واللي بيجيب علامة الاظتفهام.. وبما اني باظأل يبقى لاظم يكون شغال..مظبوط ولا مش مظبوط ؟؟