قائمة من أجمل الأغاني الجديدة

الأغاني بالنسبة لي جزء لا يتجزأ من شخصية الإنسان.. هأقول لكم ازاي.. بصراحة انا تاني سؤال بسأله للناس اللي باتعرف عليها وعلى شخصيتها هو "انت بتسمع لمين؟ ".. وعمره ماخذلني السؤال ده ابدا..

للأسف أغلب زمايلي بيسمعوا تامر حسني..عمرو دياب.. اليسا.. نانسي عجرم.. اكمل.. ومصطفي قمر.. ما اعرفش غير عدد من الأشخاص يتعدوا على صوابع الأيد الواحدة ..ايد واحدة بس والله.. اللي بيسمعوا للفرق الموسيقية او للأغاني الأجنبية أو حتى للأغاني القديمة لعبدالحليم او فيروز.. و للسمفونيات.. أخويا و صديقتي.. وأنا.. ده غير بقى الشخصيات العامة اللي ما اعرفهاش شخصيا.. ودول عددهم كبير.. بالنسبة لصوابع الأيد الواحدة طبعا..

فبالصلى ع النبي كده الأغاني اللي هاحطها هنا مش فيديو كليبات لتمورة أو لساموزين.. هيا لناس انا باحترمهم اوي و باسمع لهم.. لو انت مهتم تسمع لهم شوف الباقي من الموضوع..

و الأهم لو انت مش من المهتمين بيهم أو مش عارفهم اساسا.. بص على باقي الموضوع كمان.. يمكن تغير رأيك..

ملحوظة: الأغاني اللي ف اللستة دي الاغاني اللي ليها فيديو كليب..في أغاني جميلة اوي بس مالهاش فيديو.. 

أكتر أغنية عبرت باللي باسميه "العروبة".. أغنية "عنواني" لأحمد زاب ثروت وفرقة صدفة ومحمد سويد..

بجد كل ما اسمعها بادمع.. كأنها قالت كل اللي عايزة اقوله لفلسطين..

أجمل أغنية صورت الميدان وروحه.. أغنية "صوت الحرية " لأعضاء فرقة كايروكي امير عيد وهواري وهاني عادل عضو في فرقة وسط البلد.. يمكن دي تكون اتشهرت اوي في التلفزيون بعد الثورة.. الفيديو بيرجعني تاني للميدان وأنا قاعدة بأشوفه من البيت..

أغنية بترجع الأمل جوايا.. أغنية " باحلم " لفرقة كايروكي واحمد زاب ثروت وهاني عادل.. ومستوحاة من برنامج متشوقة أوي لرؤيته وهو Egy 2020 .. بجد أفكار تتأكد ان مصر هتكون أحسن مدام في ناس بتفكر بالتفاؤل والذكاء ده..     

 

أغنية " زار " لفرقة صوت في الزحمة.. أغنية جميلة وفيها روح مصرية..

 

أغنية أو بمعنى أصح "مرسال".. بجد مرسال لحبيبتي بجد راقي أوي وجميل.. رومانسي ومصري أوي..

أغنية اتبسط أوي لما سمعتها وأتمنى بجد انها تبقى بداية اتحاد العرب كلهم مع بعض.. علشان نقدم فن هادف وعلم ونتقدم و"نلحق بركب التقدم".. مقتبسة من مواضيع التعبير بتاعة مدارسنا.. أغنية "خلينا نحلم " انتاج تونسي مصري مشترك..

أغنية " أنسان " لحمزة نمرة.. فنان جميل.. والأغنية انسانية وهادفة.. وجميلة..

                                        

أغنية " بحار" لفرقة بلاك تيما.. فرقة جميلة وأغنية باحس فيها بروح مصرية ظريفة.. البحر والصيد وأكلة السمك المشوي ف اسكندرية والاسماعيلية .. مش عارفة.. بس باحبها وخلاص..

أغنية لمغني سعودي..علاء وردي .. صوته وستايل أغانيه ظريف أوي.. أنا باحب اغانيه كلها بس دي بالذات بقى جامدة.. لأني مش فاهمة منها حاجة.. ولأن الصورة بتاعة الفيديو ده مختلفة وجميلة.. "شلمونتي فلحال"

 وبس كده بقى.. كفاية عليكوا كده النهاردة.. سلام

ملحوظة.. أغلب الأغاني وطنية بس اصل روح الثورة لسة مأثرة عليا شوية..